Filastrocche - Laboratorio della memoria Montevago

 Laboratorio della memoria
Vai ai contenuti

Menu principale:

Filastrocche

Tradizioni

Filastrocche per bambini, ninne nanne, poesie  e invocazioni religiose

a cura di Mimmo Barrile, con il prezioso contributo di Pino Di Napoli, Nino Barrile (Professore),  Caterina Schimdt ed Angela Eletto Lucido


Dumani è duminica,
tagghiamu la testa a Minica,
Minica 'un c'è,
la tagghiamu a lu re,
lu re è malatu,
la tagghiamu a lu surdatu,
lu surdatu fà la guerra,
la tagghiamu a Purcinella,
Purcinella jiu a l’ortu,
jiu a cogghiri  un finocchiu,
lu finocchiu ci cadiu
e to soru ci lu spincìu.


***********

'Mme 'mme 'mme, tutti li pecuri fannu 'mmè,
lu latti di la crapa, la mennula pistata,
affaccia lu suli cu' tri cavaddi d'oru,
d'oru e d'argentu vattinni a lu cummentu,
lu cummentu è chiusu vattinni   'dda gghiusu  
chi ci sunnu l'anciuliddi chi cogghinu ciuriddi,
una a tia, una a mia e una a la Vergini Maria

********

Luna, Lunedda  Fammi ‘Na Cudduredda,
Fammilla Bedda Granni Sinno’ ti scacciu li cianchi,
li cianchi a l’ammucciuni ,
affaccia lu baruni ,
lu baruni Jiu a la missa,
affaccia la Batissa,
la Batissa frii l’ova,
affaccia affaccia San Nicola,
San Nicola scaccia nuciddi  
pi chiamari li picciliddi,
li  picciliddi hannu fami  
pi chiamari  li  mulinari,
li mulinari hannu  lu furmentu,
pi chiamari lu bastimentu,
lu bastimentu havi la farina,
pi chiamari la addina,
la addina firria firria
e fa un’ovu  quantu  a tia
                                    


*********

Mezziornu tavula attornu,
veni la atta e si licca lu cornu


********


Sutta lu lettu di la  za Maria,
Jennu e vinennu  cuttuni  cugghìa,
addinucchiatu cugghennu cuttuni

*******


Ncapu  un palazzu c’e’ un cani pazzu.
T’e’ pazzu cani stu pezzu di pani

*******



Chi? Chicchirichì,
sutta lu  lettu ci 'nne’ tri,
e cu tia fannu quattru,
tu si sceccu e jeu ti cacciu,
e ti cacciu c’un vastuni,
tu si’ sceccu e jeu  patruni

*******




Ntiu Ntau, Ntiu Ntau.
Cu Muriu? Paulu piu.
Dunni Muriu? A la punta di l’ortu:
Paulu Piu Beccamortu.

*******




Luna, Luna , Luna,di lu celu si’ patruna,
dunni vai a tali banni mi saluti a San Giuanni.
San Giuanni e’ ‘a la marina, mi saluti a Catarina.
Catarina, Catarina, cu’ ti la detti sta catina?
Mi la detti lu Signiruzzu cu la Matri di Diu e San Gisippuzzu


*******





Sutta Un Pedi Di Rusidda
C’e’ ‘Na Santa Piccilidda,
Chi Addumanna Un Surdiceddu,
P’accattarisu un Cappeddu,
Lu Cappeddu Ci Vulau
A’ Rusidda C’iarristau
C’arristau Spampinata,
Viva Viva la Mmaculata,
La Mmaculata Parturiu
Fici Un Figghiu E Ci Muriu
Si Chiamava Sarvaturi
Mittitici Turi
Comu nostru Signuri

******



Lu Vapuri Sta Partennu,
La Carrozza Sta ‘Mpaiannu
Pippineddu Sta Jucannu
Chi Si Voli Maritari
Passa La Zita Cu La Vistina Di Sita
Passa La Cugnata Cu La Vistina Riccamata
Passa La Za’peppa Cu La Quartara ‘Ntesta
Passa Lu Baruni Cu ‘Mpiattu Di Maccarruni
Miau, Miau , Miau
Tutti Lu Attu Si Li Manciau

******



Vinturi Sona Vinturi ,
La  Vecchia Si ’Nchiudi,
Lu  Monacu Canta ,
La Vecchia Si Scanta

******

Voca, voca, voca,
la mamma si mancia l'oca,
lu tata la addina
e to soru si stringi la vistina

******

Pani e palettu signuri e cummari
aiu nna`figghia chi voli jucari
voli jucari a trenta tri,
unu dui e tri!

******

Peppinnappa, mungi la vacca.
Tenila forti chi ti scappa.
Sinni scappa 'mezzu lu chianu.
Peppinnappa ruffianu

*******

Sutta lu lettu di la zà Cicca
c'è 'na atta longa e sicca,
cu' parla prima, si la licca

*******

Giuvanni Cacalanni,
Jetta pidita e fa castagni,
li fa a dui a dui,
Giuvanni si 'nni fùi,
sinni fùi 'cu 'nna virginedda
e Giuvanni puddicinedda!






 
 
Torna ai contenuti | Torna al menu